आगामी शैक्षणिक वर्षापासून सर्व राज्य मंडळाच्या शाळांमधील इयत्ता 1 ते 8 मधील विद्यार्थ्यांसाठी महाराष्ट्र शिक्षण विभागाकडून “हॅपी सॅटर्डे” हा कार्यक्रम सुरू करण्यात येणार आहे. विद्यार्थ्यांची शैक्षणिक कामगिरी आणि शिकण्यात उत्साह वाढवणे, गळती आणि अपयशाचे प्रमाण कमी करणे आणि विद्यार्थ्यांचे मानसिक आरोग्य जतन करणे हे या कार्यक्रमाचे उद्दिष्ट आहेत. याबाबतचा अध्यादेश राज्याच्या शिक्षण विभागाने जारी केला आहे.
शिक्षण विभागाच्या परिपत्रकात असे म्हटले आहे की “हॅपी सॅटर्डे” उपक्रमांमध्ये पुढील गोष्टींचा समावेश आहे: प्राणायाम, योगासने, ध्यान (धारणा), श्वासोच्छवासाचे व्यायाम, आपत्ती व्यवस्थापनाचे मूलभूत आणि व्यावहारिक प्रशिक्षण, दैनंदिन आर्थिक व्यवस्थापन, आरोग्याशी संबंधित उपाययोजना, रस्ता सुरक्षा, समस्या सोडवण्याचे तंत्र इ.
राज्याचे शिक्षण मंत्री दीपक केसरकर म्हणाले, “विचार आणि कृती करण्याची क्षमता असलेल्या आणि करुणा, सहानुभूती, साहस, लवचिकता, वैज्ञानिक विचार, धोरणात्मक कल्पनाशक्ती आणि नैतिक मूल्ये बाळगणाऱ्या चांगल्या माणसांचा विकास करणे हे नवीन राष्ट्रीय शैक्षणिक धोरणाचे महत्त्वाचे उद्दिष्ट आहे. सध्या विद्यार्थ्यांना तणाव आणि नैराश्य (लहान वयातही) अशा मानसिक विकारांचा सामना करावा लागत आहे. या पार्श्वभूमीवर, शाळेत आनंददायी उपक्रम राबविण्याची गरज प्रकर्षाने जाणवते.”
